سنترال بهنس حلقات اسبوعية

سنترال بهنس حلقات اسبوعية
الحلقة الاولى



المكان: سنترال قرية بهنس

الزمان : اى وقت من اول اختراع التليفون لحد مانت بتقرا مش منا بكتب



- لو سمحت عاوز ادفع الفاتوره

- اول شباك يا حج

- مش دفع الفواتير هنا؟

- اول شباك يا اختى

- فين الفواتير ياخويا؟

- اول شباك يا حاجه

- خد ميه واحد وخمسين وهات خمسه جنيه صحيحه

- ليه؟

- فاتورتى ميه سته واربعين

- اول شباك يا بيه

"هو الناس اغبيا ليه؟ على فكره انا بكره البنى ادميين جدا بأه...... اشمعنى يسال فى تالت شباك؟ ليه ميروحش اول شباك علطول؟ ده الطبيعى يعنى.......... المعامله مع الناس ممله اوى عشان كده بحب النباتشيات بيبقى الواحد مع نفسه واحلى مزاج"

.......................................

(نفس اليوم اللى فى نفس الزمان اللى انت بتقرا فيه بس بالليل)

"ايوه كده النباتشيه احسن بكتير فضا ومزاج ومفيش حاجه تعكر الليله الا واحد غلس عاوزنى احوله مكالمه واتصل الاقيها مشغوله علطول.....وبتحصل كتير ......الله..... هوانا معرفتكوش بنفسى؟ انا حامد عابدين البهنساوى رئيس وحدة فى سنترال بهنس وعايش فى بهنس نفسها برده...... ارمل ومرتاح والاتنين واحد والعيال اتجوزوا بعيد عنى وعايش مرتاح اوى اصل الجواز .......... ترررررررررررررررن

- سنترال معاك

- لو سمحت حولى النمره دى ؟؟؟؟؟؟؟؟ مصر

- ثوانى................معاك مصر يا سيدى

"كنا بنقول ايه ........... اه انا عايش تمام وزى الفل وكده راحه اصل البنى ادميين دول قلق ووجع دماغ وانا شغال فى سنترال شوفوا انتوا باه قمةالقرف وشغلانه بتعتمد على الاحتكاك مع البنى ادميين اصلا ومش اى بنى ادميين لا دول كمان بتوع بهنس يعنى ربنا يكون فى عونى............هو الراجل لسه بتتكلم؟........ اصل ساعات بيقفل ويكون الخط معلق والناس تتصل تلاقينى مشغول ثوانى دوسة زراربس.......... "الراجل هنموته فى دقيقه ونخلص".........بس كده الراجل لسه بيتكلم.......... المهم .......انتوا سمعتوا؟ لا نتابع باه معاهم.......... ولا كده غلط وتجسس؟ .......غلط غلط ده بيقولك هيموتوا الراجل اسمعوا معايا..........."

- .......... امرها سهل متقلقش

- ازاى بس

- يا عم كل واحد له دوره انت خايف ليه؟

- مش مسالة خوف بس انت مجربتش السجن

"الله يا عبد الله ........هى فيها سجن"

- لا كل حاجه مترتبه زى ماقلتلك انت عليك تلهى الغفير وتقوله عاوز ولعه ولا تساله على عنوان وزغلول من وراه يموته بعدها انا وحمدان ندخل جوه وانت تراقب الطريق بس كده

- طب والخزنه؟

- ما قلتلك امرها سهل حمدان دكتور فى الحاجات دى مفيش باب ولا خزنه بعون الله تقف قدامه

"ال بعون الله ال"

- خلاص هننفذ امتى؟

- بعد ساعه

- ايه يا عم ليه كده؟

- هو كده صاحب الفيلا رايح حفله النهارده وانا مرتبلها من شهرين الحكايه دى ولسه مستلم فلوس الارض بتاعته النهارده يعنى العمليه متظبطه والفيلا فاضيه غيرش بس الغفير والجناينى هم اللى نخلص منهم وبعدين الفيلا تبقى بتاعـ...

"الله يا عبد الله .......دول بقوا اتنين"

- لا يا عم متفقناش على كده هنموت اتنين ........ دى فيها اعدام بالراحه دى

- ماهومفيش حلاوه من غير نار يا حوده برده وبعدين يا عم انت ولا هتقتل ولا هتعمل حاجه خايف من ايه باه؟

- ما علينا على رايك

- طب اتناشر بالظبط عند قهوة دبور متتاخرش كل حاجه بمعادها فاهم

- حاضر

- سلام يا روش

- سلام يا زعيم

"..............ها سمعتوا معايا وملهاش حل اظن قفلت زى الدومنا لو بلغت هدخل معاهم السجن عشان بتصنت ولو مبلغتش الناس هتموت ومش هسامح نفسى ابدا..............طب والعمل؟ ..........فكره اتصل بالقسم ومقولش اسامى...... اكلم بس الظابط النباتشى اشطات ...........اااااااااااه طب لو جاب النمره يا بطل؟ يجيب يا عم ده انا السنترال نفسه سهله دى"

- السنـ.... ايوه يابنى مين حظابط اللى عندك؟

- سيادة الرائد مدحت باشا يا باشا

- طب حولنى عليه بسرعه

- نقوله مين يا باشا؟

- قوله ........قوله واحد صاحبه وعاوزه ضرورى

- حاضر يا باشا

.......................

- نعم

- ايوه يا باشا معاك فاعل خير

- وعاوز ايه ياخويا طلبت معاك تفعله دلوقتى؟

- يا باشا فيه ناس هيسرقوا فيلا الدمنهورى بعد ساعه

- ربنا يوفقهم....... عاوز حاجه؟

- يا باشا هيموتوا الجناينى والغفير

- وعاوز منى سلاح يعنى ولا عاوز ايه؟

- يا باشا مش انا دول هم

- طب وانت دورك ايه معاهم يعنى؟ انت اللى هتبلغ البوليس؟

- لا يا باشا انا سمعتهم بالصدفه وهيتقابلوا على قهوة دبور بعد ربع ساعه

- ربنا يقويهم

- يا باشا......

- هم عملوا حاجه؟

- لا بس بعد ساعه هـ....

- لما يبقوا يعملوا

- دول هيموتوا الغفير والجناينى يا باشا

- عمرهم كده انت هتتدخل فى ارادة ربنا...........اقفل يا حيوان .........كليك

"وبعدين باه اعمل انا ايه دلوقتى؟......... يا سلام هتصل بالمديريه لما نشوف اخرتها يمكن اللى هناك مفتح شويه عن ده"

- ايوه يبنى مين عندك؟

- مين ازاى يا باشا؟

- مين النباتشى يبنى من الظباط

- الباشا محمد باشا يا باشا

- طب قوله ابن عمه عاوزه حالا

- خير يا باشا؟

- وانت مالك يا اخى روح

- طب انهى باشا عم فيهم يا باشا؟

- يبنى قوله وخلاص وانت مالك انت

- حاضر يا باشا

......................

- ابو خليل ازيك يله

- انا مش ابو خليل حضرتك انا فاعل خير وعاوز ابلغ عن حاجه

- اه عارفك مش انت اللى بتطلع فى الافلام؟

- لا ده بجد يا باشا

- طب قول خير قلقتنى

- فيه جريمه هتحصل دلوقتى حضرتك ولازم نمنعها

- تؤ تؤ تؤ يا حرام....... لا لازم نمنعها دلوقتى فعلا متقلقش انت كن مطمئن احنا سهرانين على راحة المواطنين

- الله يخليك يا باشا هم هيقتلوا الغفير والجناينى و.......

- الله دى عصابه كبيره اوى كويس انك بلغتنا روح بس نام انت وارتاح احسن شكلك تعبان اوى واستغطى كده كويس ولو فيه دوا بتاخده متكسلش واحنا خنقبض على الحراميه كلها..............ده ايه المجانين اللى على بالليل دى.........كليك

"وادى التانى افتكرنى مجنون طب اكلم مين طيب انا دلوقتى؟ ...........اااااااااااه مفيش غيره حصول فتحى ده راجل شديد وعقله يوزن بلد"

- الو

- انت مين؟

- انا عاوز ابلغك عن جريمة قتل

- يا ساتر حصلت امتى وفين؟

- لا دى هتحصل

- طب لما تبقى تحصل احنا الشرطه جهه تنفيذيه مش من اختصاصنا منع الجريمه قبل وقوعها

- بس دى حاجه انسانيه ملهاش دعوه شرطه ولا لأ

- اه عندك حق قول يا سيدى .........هاتيلى قلم وورقه يا ام السعد احسن فيه اشاره جت

- عيال هيسرقوا فيلا الدمنهورى بعد ساعه وهيتجمعوا على قهوة دبور

- طب عينيه انا هروح الم كل اللى على قهوة دبور دلوقتى واللى ماشيين فى الشارع كمان عشان خاطرك

- لا خد العيال دول بس

- يا سلام بس كده انا تحت امرك اساميهم ايه واوصافهم بس واحنا فى خدمة الشعب

- اوصافهم؟

- اه

- معرفش

- انت بتستعبط؟ اجيب عيال معرفهمش ومعملوش حاجه؟ اقفل يا ابن الـ........

- بس دى حاجه انسانيه

- انسانيه ...انسانيه....فلقتنى متروح انت وارحمنى يا اخى.........كليك

"اغبيا اغبيا دايما فى اى احتكاك بالبنى ادميين بتخنق من غباءهم طب والحل؟ معنديش اى نمر للدمنهورى ولو رحت لاى ظابط فيهم هيحولنى على مستشفى المجانين وفى احسن الاحوال هيبيتنى فى الحجز وبكره يعتبرنى شريك معاهم...........يا رب اعمل ايه بس.............بقول ايه ما بدهاش باه انا اروح قهوة دبور وربنا يستر"

............................

(نفس اليوم اللى فى نفس الزمان اللى انت بتقرا فيه بس الساعه اتناشر بالليل )

(المكان :قهوة دبور- الحقيرة)



"لخمسه ونص .......وانا واقف بستناك ..........وعينيه علـ........."

"ده صباح البيئه يعنى ..........وانا مالى انا هقعد فى حالى اشرب الشاى بتاعى واراقب العيال لما ييجوا .......اكيد منظرهم هيبان"

- نعم؟

- نعم ايه؟

- هتشرب حاجه ؟

- اه هاتلى نعناع

- اه عينيه....... اجيبهولك فى بزازه ولا معاك زمزميه؟

- ايه ده يا بنى ادم انت......

- انت جاى غرزه وعاوزلى نعناع انت راخر على اخر الليل

- يا عم عندك ايه اخلص

- مفيش غير جوزه وشاى

- هاتلى شاى

- وجوزه؟

- لا شاى بس

- يبقى هتدفع تمن الجوزه لان هنا منمن شارش (minimum charge)

- هات اللى تجيبه بس اخلص

"........يا حبيبى ومش شايفاك ........عم شوقى ...يا حبيبى.......قول يابو على ...."

- اهو واحد جه اهو وشكله باين انه حرامى بس والله ان كان على الشكل كل اللى على الغرزه دى حراميه............اه واحد تانى جاى اهو .........قاعدين فى ركن بعيد .....وشكلهم باين على العموم لو جه اتنين كمان يبقى الحكايه صح وهم بالظبط"

" تدينى معاد فى العتبه ........وتجينى فى باب اللوق.........ما تطلع مره....."

- اربعه شاى واربعه جوزه معاك يا كموله الرجاله جايه اهى بس بسرعه وحياة ابوك

- عينيه يا زعيم

"اهو اهو اهو قاله يا زعيم زى الواد ما قاله فى التليفون........صح انا ماشى صح كده ......هم دول واللى معاه ده حوده........وكمان بصوا هناك الرجاله اللى قال انهم جايين دول تلاقيهم حمدان وزغلول وطبعا العريض اوى ده زغلول اللى هيقتل الغفير"

"...........اتفقنا احنا الاتنين ..........انا الرمش وهو العين.....العين من جوه .....العيـ....."

- رجاله ...اهلا يا ابو زغلول......... حمدان ....منورين

- نورك يا زعيم

- الحجاره يله

- هوا........ اسرع من الصوت اهو

- ها يا رجاله.............

" اه قربوا من بعض وانا مش سامع حاجه .......طب وبعدين؟ كده الرؤيه وضحت.....طب وبعدين الحجاره جت عندهم.........طب وبعدين؟.........."

- يا باشا الشاى

- تسلم

- بقول ايه يا باشا

- ها

- مش جاى

- هو مين؟

- سقراط

- مش فاهم

- يا سيدى امان متخافش انا معايا صنف انضف من اللى بيجيبه سقراط وبنص تمنه

- اااااااااه لا يخويا مليش انا فيه

- يا عم جربه مش هتخسر حاجه

- يا سيدى مش عاوز ومليش انا فى الليله دى

- طب خد حته اهى ببلاش وهتدعيلى

- يا عم مش عاوز

- اااااااااااه ده انت شكلك مرشد باه

- لاااااااااااااااا هات

- ايوه كده يا زمل خليك حلو ولو عجبتك انا هنا دايما حطها فى جيبك بسرعه اللى هناك ده مباحث

- ماشى ياخويا

"تحيه غاليه للاستاذ مجدى غطاس والاستاذ يوسف عبد الرحمن والوايلى واهل الوايلى قول يابوعلى قول يابوعلى قول يابو........"

"الله يخرب بيت الانسانيه ...........اعمل انا ايه دلوقتى؟ منا مش هروح وراهم مش هعرف اعمل حاجه غير انى ازود العدد تلاته وخلاص...يا رب......انا ازوغ وخلاص احسن"

- الحساب يا بيه

- اه استنى كام صحيح؟

- خمسه جنيه

"والله فكره "

- ليه؟

- ليه ايه يا بيه .....الحته معاك لسه بكيسها

- حتة ايه يا كلب مفيش حكومه هنا يا بوليــــــــــــــــــــس

- خلاص يا عم مش عاوز حاجه

- لايمكن الحقونىىىىىىىىىىى

"اشطات اهو المباحث ده بيتكلم فى اللاسلكى.............وادى عربية الدوريه جت"

- خدهم كلهم على البوكس

"مش مهم انا المهم ان كله جه معايا الاربعه والقهوجى نفسه وكل اللى على القهوه"

.................................

الزمان : نفس اليوم اللى فى نفس الزمان اللى انت بتقرا فيه بس الفجر باه

المكان : نقطة شرطة بهنس



- يعنى انت عاوز تفهمنى انك راجل محترم؟

- يا فندم ماهو انا اللى اتصلت بيك

- ايوه يعنى معاك حشيش وقاعدلى على غرزه واتصلت بيا بتشتغلنى وعاوزنى اسيبك؟

- يا باشا انا رئيس وحده فى السنترال هنا ده حتى انا نباتشى دلوقتى

- وكمان مزوغ عشان كيفك طب معندكش عيال اولى بالفلوس دى

- يا باشا عشان امنع الجريمه دى

- جريمة ايه يبنى بس

- اصل الحكايه......................

...........................................

"طبعا الظابط صدقنى................ العيال معاها الاسلحه وانهاروا لما عرفوا ان الظابط عارف كل حاجه او انهاروا لما اضربوا ....... المهم انهم اعترفوا ........... بس توبه انى اعملها تانى ولا انسانيه ولا زفت طول منا بعيد عن الناس انا زى الفل ويمكن مش هكتب مذكراتى تانى لانى هعتزل الناس خلاص مش هيبقى فيه حكايات"



ونكمل باقى الاجزاء بعد الردووووووووووووووود